စားနပ်ရိက္ခာနှင့် လောင်စာဆီဈေးနှုန်းများမြင့်တက်လာမှု မြန်မာနိုင်ငံ၏ အဆင်းရဲဆုံးနှင့် အထိခိုက်လွယ်ဆုံးလူထုများကို အန္တရာယ်ပြုစေနိုင်ကြောင်း ကမ္ဘာ့စားနပ်ရိက္ခာအစီအစဉ် (WFP) သတိပေး ရန်ကုန်- ၂၀၂၁ မတ်လ ၁၆ (မော်ကွန်း) လက်ရှိ နိုင်ငံရေး မငြိမ်သက်မှုအခြေအနေသည် ကုန်စည်စီးဆင်းမှုကွင်းဆက်များ (Supply Chains) နှင့် စျေးကွက်များ‌အပေါ်သို့ အကျိုးသက်ရောက်လာသည်နှင့်အမျှ စားနပ်ရိက္ခာနှင့် လောင်စာဆီဈေးနှုန်းများ မြင့်တက်လာလျက်ရှိကြောင်း ကုလသမဂ္ဂ ကမ္ဘာ့စားနပ်ရိက္ခာအစီအစဉ် (WFP) က သတိပေးသည်။ WFP ၏ စားနပ်ရိက္ခာဈေးနှုန်း စောင့်ကြည့်လေ့လာချက်များအရ အချို့သော မြို့ပြဒေသများတွင် စားနပ်ရိက္ခာဈေးနှုန်းများ မြင့်တက်နေလျက်ရှိကြောင်း တွေ့ရှိရသည်။ ရန်ကုန်မြို့၏ မြို့ပြဆင်ခြေဖုံးဒေသများတွင် ဖေဖော်ဝါရီလဆန်းပိုင်းမှစ၍ စားအုန်းဆီ လက်လီစျေးနှုန်းသည် (၂၀) ရာခိုင်နှုန်း မြင့်တက်ခဲ့ပြီး၊ ရန်ကုန်နှင့် မန္တလေး မြို့ပြဆင်ခြေဖုံးဒေသများရှိ ဆန်ဈေးနှုန်းများသည် ဖေဖော်ဝါရီလနောက်ဆုံးအပတ်မှစတင်ကာ (၄) ရာခိုင်နှုန်း မြင့်တက်လာခဲ့သည်။ နိုင်ငံ့အဝှမ်း လေ့လာလျက်ရှိသည့် စျေးကွက်များ၌ ဆန်စျေးနှုန်းများသည် ဇန်နဝါရီလလယ်မှ ဖေဖော်ဝါရီလလယ်အတွင်း ပျမ်းမျှ (၃) ရာခိုင်နှုန်း မြင့်တက်ခဲ့ရာ၊ ဗန်းမော်နှင့် ပူတာအိုအပါအဝင် ကချင်ပြည်နယ်၏ မြို့နယ်အချို့တွင် ဆန်စျေးနှုန်းမြင့်တက်မှုမှာ (၂၀) ရာခိုင်နှုန်း မှ (၃၅) ရာခိုင်နှုန်းအထိပင်ရှိကြောင်း တွေ့ရှိရသည်။ “ ဒီရှေ့ပြေးလက္ခဏာတွေဟာ အထူးသဖြင့် တစ်နေ့စာတစ်နေ့ ရှာဖွေစားသောက်နေကြရတဲ့ အထိခိုက်လွယ်ဆုံးသူတွေအတွက် တကယ့်ကို စိတ်ပူစရာဖြစ်ပါတယ်။ ရှိနေပြီးသား COVID-19 ရဲ့ ရိုက်ခတ်မှုတွေပေါ်မှာမှ အခုလို ကုန်စျေးနှုန်းတွေ ဆက်ပြီးမြင့်တက်နေဦးမယ်ဆိုရင် အနွမ်းပါးဆုံးနဲ့ ထိခိုက်အလွယ်ဆုံးရပ်ရွာလူထုတွေအနေနဲ့ မိသားစုထမင်းဝိုင်းမှာ ဝဝလင်လင် စားသောက်နိုင်ဖို့ အတော်ကို ရုန်းကန်ကြရမယ့်အခြေအနေပါ” ဟု WFP ၏ မြန်မာနိုင်ငံဆိုင်ရာ ဌာနေကိုယ်စားလှယ် Mr Stephen Anderson က ပြောသည်။ ရခိုင်ပြည်နယ်မြောက်ပိုင်းတွင် ဇန်နဝါရီမှ ဖေဖော်ဝါရီလအတွင်း ပျမ်းမျှ စားသုံးဆီဈေးနှုန်းသည် (၂၇) ရာခိုင်နှုန်းအထိ မြင့်တက်ခဲ့သည်။ ထို့အတူ မောင်တောမြို့နယ်တွင် ပဲမျိုးစုံဈေးနှုန်းသည်လည်း (၁၅) ရာခိုင်နှုန်း မြင့်တက်ခဲ့သည်။ စားသုံးဆီဈေးနှုန်း မြင့်တက်မှုများကို ရခိုင်ပြည်နယ်အလယ်ပိုင်းတွင် (၁၁) ရာခိုင်နှုန်း နှင့် တနင်္သာရီတိုင်းဒေသကြီးတွင် (၁၄) ရာခိုင်နှုန်းအထိ တွေ့ရှိရသည်။ လောင်စာဆီစျေးနှုန်းများတွင် နိုင်ငံအဝှမ်း ဖေဖော်ဝါရီ (၁) ရက်မှစ၍ (၁၅) ရာခိုင်နှုန်းမြင့်တက်လာကြောင်း WFP က တွေ့ရှိခဲ့သည်။ လောင်စာဆီစျေးနှုန်းများမြင့်တက်မှုသည် စားနပ်ရိက္ခာစျေးနှုန်းများ ထပ်မံမြင့်တက်လာအောင် တွန်းပို့နိုင်မည့် အခြေအနေရှိပါသည်။ ရခိုင်ပြည်နယ်မြောက်ပိုင်းတွင် ဓာတ်ဆီစျေး (၃၃) ရာခိုင်နှုန်းနှင့် ဒီဇယ်စျေး (၂၉) ရာခိုင်နှုန်းအထိ မြင့်တက်ခဲ့သည်။ စားသောက်ကုန်နှင့်လောင်စာဆီစျေးနှုန်းများမြင့်တက်လာခိုက်တွင် ဘဏ်လုပ်ငန်းကဏ္ဍလည်ပတ်မှု ဆိုင်းငံ့သွားခြင်း၊ ငွေလွှဲပေးပို့မှုများ နည်းပါးသွားခြင်းနှင့် ငွေသားလက်ဝယ် ရရှိနိုင်မှု အကန့်အသတ်များ ကျယ်ကျယ်ပြန့်ပြန့်ဖြစ်ပေါ်လာခြင်းစသည်တို့က အခြေအနေအရပ်ရပ်ကို ပိုမိုခက်ခဲသွားစေပါသည်။ WFP အနေဖြင့် လက်ရှိတွင် တိုက်ပွဲရှောင်စခန်းများတွင်နေထိုင်နေကြသော နေရပ်စွန့်ခွာရသူများ လူဦးရေ ၃၆၀,၀၀၀ ကျော်အတွက် လစဥ်ထောက်ပံ့ပေးလျက်ရှိသော ကယ်ဆယ်ရေး စားနပ်ရိက္ခာနှင့် ငွေသားအထောက်အပံ့များ ရပ်တံ့သွားခြင်းမရှိစေရန် ရည်ရွယ်ချက်ဖြင့် အရေး‌ပေါ်အရံစားနပ်ရိက္ခာများကို ဝယ်ယူစုဆောင်းလျက်ရှိပါသည်။ အကယ်၍ ကုန်စည်စီးဆင်းမှု နှောင့်နှေးသွားပါက သို့မဟုတ် ငွေသားရရှိနိုင်မှုအခက်အခဲများ ဆက်လက်ဖြစ်ပေါ်နေပါက အဆိုပါအရေးပေါ်အရံစားနပ်ရိက္ခာများကို အသုံးပြုကာ WFP အနေဖြင့် လစဥ်ပေးအပ်လျက်ရှိသော ငွေသားအထောက်အပံ့များအစား အရေးပေါ်စားနပ်ရိက္ခာအထောက်အပံ့အဖြစ် ပြောင်းလဲပေးအပ်နိုင်မည်ဖြစ်ပါသည်။ “ မကြာသေးမီကကျင်းပပြုလုပ်ခဲ့တဲ့ ရွေးကောက်ပွဲမှာ ထင်ဟပ်ခဲ့တဲ့ မြန်မာပြည်သူပြည်သားတွေရဲ့ဆန္ဒသဘောထားကို လေးစားလက်ခံလိုက်နာကြဖို့ ကမ္ဘာ့ကုလသမဂ္ဂအထွေထွေ အတွင်းရေးမှူးချုပ် တိုက်တွန်းခဲ့တဲ့အတိုင်း WFP အနေနဲ့ ထပ်လောင်းတိုက်တွန်းပါတယ်။ ငြိမ်းချမ်းရေးနဲ့ ညှိနှိုင်းဆွေးနွေးမှုတွေကို ဘေးဖယ်ထားလိုက်တဲ့အခါမျိုးမှာ ငတ်မွတ်ခေါင်းပါးမှုအခြေအနေတွေ ဘယ်လိုမြန်မြန်ဆန်ဆန်ဖြစ်ပေါ်လာနိုင်သလဲဆိုတာ နိုင်ငံတကာ အတွေ့အကြုံတွေ့အရ ကျွန်တော်တို့ WFP က ကောင်းကောင်း သိရှိနားလည်ထားပါတယ်” ဟု Mr Stephen Anderson က ပြောသည်။ WFP ၏ ကုန်စျေးနှုန်း အချက်အလက်များကို မြန်မာနိုင်ငံရှိ မြို့နယ်ပေါင်း (၇၀) ကျော်မှ စျေးပေါင်း (၁၀၀) ကျော်နှင့် မတူညီသောကုန်သည်များနှင့် စျေးဆိုင်‌ပေါင်း (၂၅၀) မှ ကောက်ယူရရှိခဲ့ခြင်းဖြစ်ပါသည်။ ပုံစာ- ရန်ကုန်မြို့လယ်ကောင်တွင်အာဏာရှင်စနစ်ဖျက်သိမ်းရေးတောင်းဆိုနေသည့် ပြည်သူများကို ဖေဖော်ဝါရီလအတွင်းက တွေ့ရစဉ်။ ဓါတ်ပုံ- မော်ကွန်း Credit: